بسم الله الرحمن الرحيم

الاحتياطات التي لابد من الانتباه لها في الشتاء فى المعمل

بعض الاحتياطات التي لابد من الانتباه لها في الشتاء في معامل التحاليل الطبية 

أولا : على باب المعمل :-

ــــــــــــــــــــــــــــــــــ

1- حاول توفر شباشب بيضاء مغطاة اللي يدخل معملك يخلع حذاءه ويلبسها

2- إياك تقفل الباب وزجاج الشبابيك في الشتاء بشكل دائم، لابد من التهوية بشكل دائم  لمكافحة العدوى

ثانيا : عند السحب :-

ــــــــــــــــــــــــــــــ

1- غرفة السحب لازم تكون نظيفة.

2- الغرفة لازم تبقى دافية وإلا الناس هتتعبك في السحب.

3- دفي ايدك قبل ما تسحب لو حاسس ان البرد مأثر عليها.

4- بدل ما تفضل تضرب على الوريد عشان يظهر ويبان ، خلي المريض يحرك ايده ويثني ساعده ويفرده لتدفئة اليد وإظهار الأوردة.

5- يفضل تسحب وانت قاعد على كرسي عشان نَفَسَك ووجهك يكون بعيد عن نَفَس المريض وفمه.

6-بعد السحب المريض يفضل فارد ذراعه ويضغط على القطنة مكان السحب ، مش مسموح له يتسرع عشان سقعان. لأنه لو تسرع وايده ازرقت أو ورمت هيجيب الغلط عليك.

7- العينات تتقلب كويس خاصة لو مسحوبة على فلورايد.

ثالثا: داخل المعمل :-

ــــــــــــــــــــــــــــ

1- دفي ايدك قبل ما تشتغل لو حاسس ان البرد مأثر عليها لأن ايدك لو البرد مأثر عليه كل شغلك هيبقى مش دقيق.

2- إياك تشتغل سيولة وتجلط من غير سيطرة على درجة الحرارة. الشغل يبقى في حمام مائي.

3- لازم تتابع حرارة التلاجة والحضانة والحمام المائي وتتأكد من صحتها.

4- تذبذب حرارة الجو يسبب تغير فاكتور الهيموجلوبين مع كل تذبذب. لازم كل اسبوع تتأكد من الفاكتور لغاية ما الجو يستقر على درجة حرارة معينة تبقى تثبت الفاكتور.

5- الكرياتينين هيخرف بسبب البرد، أحسنلك تحضن المحلول وتشتغله في درجة 37 للاستاندر والعينات.

6- موضوع ( التحضين 10 دقائق خارج الحضانة = 5 دقائق داخل الحضانة ) ده مش في البرد.

في البرد كله في الحضانة . ما عدا اللي لازم يتعمل في درجة الغرفة زي الصفراء والالبومين.

7- بسبب البرد هتلاقي عينان بول كتير مرسبة يورات ، دفي العينة عشان تدوب اليورات قبل ما تسنترها عشان تشوف كل اللي في العينة.

8- هتلاقي حاجات بتتحرك في البراز دي الـ trophozoite خاصة الجيارديا بيعيش أكتر ويظهر في الفحص أكتر .

9- الكرفات بتاعت الاليزا هتتغير باستمرار فمتسيبش الكرف مدة طويلة ولازم مع كل رن تدخل كونترول أو استاندر كعينة عشان تتأكد من النتائج.

رابعا: الأجهزة داخل المعمل :-

ــــــــــــــــــــــــــــــــــــــــــــــــ

الحضانة والأجهزة لو مش راضيين ياخدوا درجة الحرارة أو نتايجهم ملخبطة يبقى أفضل حاجة تشغل مكيف ، فلو مش متاح يبقى تقفل غرفة المعمل كويس .

 وتعمل الآتي:-

أولا: بالنسبة للحضانة :-

1- لو الحضانة فيها فتحة تهوية يبقى تقفلها .

2- حط في الحضانة حاجات تكون مش بتتأثر جامد بالحرارة تملأ حيز كبير وتخلي الحيز اللي محتاج يتسخن صغير مثلا فوم أو ورق . ويكون الحيز المليان هو الحيز البعيد عن مكان التسخين.

3- قلل الحاجات اللي في الحضانة قدر المستطاع.

4- ممكن تستخدم لمبة صفراء 100 وات تحطها داخل الحضانة وتشغلها وهي هتساعد جدا رفع درجة حرارة الحضانة. وهتحل المشكلة تماما إن شاء الله.

ثانيا : بالنسبة للأجهزة :-

1- حط عازل حراري ( فاصل كرتون أو فيبر أو فلين ) بين الجهاز والرخام لأن برودة الرخام بتأثر على الجهاز من ناحية البرودة ومن ناحية انها بتعمل ضوضاء على كهربة الجهاز بتعمل noise ودي تبان أكثر في الكينيتيك للكيمياء وفي الصفائح لجهاز صور الدم .

2- وصل الجهاز على سيرفو أو استباليزر عشان تتأكد إن الكهرباء داخله مظبوط عشان هتخلي الجهاز مش محتاج وقت طويل في التدفئة .

3- ممكن تستخدم لمبة صفراء 150 فوق الجهاز بشوية .

4- لو الجهاز فيه بلوك متحضنش فيه حاجة.

5- حاول تستخدم ماء مقطر دافي للغسيل عشان الماء البارد بيبرد الفلو سيل ويجهد الجهاز في تدفئته ، الماء الدافي يبقى من انبوبة تحطها في الحمام المائي أو الحضانة.